Azərbaycan PR Mütəxəssisləri Assosiasiyası (APRA) və Rusiya İctimaiyyətlə Əlaqələr Assosiasiyasının (РАСО) Beynəlxalq Əməkdaşlıq üzrə İşçi Qrupunun (koordinatoru – Andrey Andreyev) nümayəndələri arasında növbəti görüş keçirilib. Görüşdə APRA-nı assosiasiyanın baş katibi Vəli Əlibəyov, RASO-nu isə birinci vitse-prezident Oleg Poletayev və Andrey Andreyev təmsil ediblər.
Görüş zamanı tərəflər aşağıdakı mövzuları müzakirə ediblər:
- RASO və APRA arasında əməkdaşlığın prioritet istiqamətləri, o cümlədən təhsil təşəbbüsləri və peşəkar ixtisasartırma proqramları;
- Rusiya və Azərbaycan PR mütəxəssislərinin iki ölkənin şirkətləri tərəfindən həyata keçirilən biznes layihələri çərçivəsində qarşılıqlı fəaliyyəti;
- Ekspertlərin Rusiya və Azərbaycanda keçirilən əsas PR forumlarda iştirakının intensivləşdirilməsi.
APRA-nın baş katibi Vəli Əlibəyov bu əməkdaşlığın əhəmiyyəti barədə danışarkən, “Biz beynəlxalq əməkdaşlığı genişləndirməkdə maraqlıyıq. Beynəlxalq PR Assosiasiyası (IPRA), Türkiyə, Mərkəzi Asiya PR assosiasiyaları ilə daimi əlaqədəyik və, şübhəsiz, Rusiya ilə əməkdaşlıq sahəsini genişləndirməyə açığıq” fikrini ssəsləndirib.
RASO-nun birinci vitse-prezidenti Oleg Poletayev isə bu əməkdaşlığın əhəmiyyətini qeyd edib: “RASO, MDB, Aİİ, BRİKS ölkələrinin PR assosiasiyaları ilə daimi peşəkar dialoqu dəstəkləyərək tərəfdaşlıq əlaqələrini gücləndirmək niyyətindədir. Müntəzəm təcrübə mübadiləsi və ən yaxşı təcrübələrin öyrənilməsi, eləcə də kommunikasiyalar və sosial trendlərin birgə analizi bizim üçün önəmlidir.”
Görüşdə Oleg Poletayev və Vəli Alibəyov yaxın günlərdə əməkdaşlıq planlarını dəqiqləşdirmək üçün Bakıda görüş keçirmək barədə razılığa gəliblər. Vəli Əlibəyov 22 noyabrda Moskvada keçiriləcək “PR Günləri 2024” tədbirində iştirak etməyə dəvət alıb.
RASO-nun beynəlxalq əməkdaşlıq üzrə koordinatoru Andrey Andreyev qeyd edib ki, “İctimaiyyətlə əlaqələr assosiasiyalarının beynəlxalq əməkdaşlığı təcrübə mübadiləsinə və peşəkar bacarıqların inkişafına töhfə verir. RASO və APRA arasında əməkdaşlıq, şübhəsiz ki, peşəkar sahənin inkişafı istiqamətində əhəmiyyətli addım olacaq.”
