Azərbaycan PR Mütəxəssisləri Assosiasiyasının baş katibi Vəli Əlibəyov beynəlxalq səviyyədə əhəmiyyətli bir uğura imza atıb. Onun iqlim dəyişiklikləri ilə bağlı qələmə aldığı esse, Beynəlxalq PR Assosiasiyasının “Thought Leadership Essays” bölməsində dərc edilib. Essedə yaxınlaşan COP29 tədbirində Azərbaycanın iqlim dəyişikliyi və davamlı inkişaf üzrə mövqeyi və bu istiqamətdəki imkanları dərin təhlil edilib.
Baş katibin essesi, COP29-un Azərbaycanın ev sahibliyi ilə baş tutması fonunda, ölkəmizin neftlə zəngin olduğu halda, bərpa olunan enerji sahəsində liderlik potensialını araşdırır. Essedə vurğulanır ki, Azərbaycan, iqlim məqsədlərinə yenidən baxmaq və davamlı inkişafı irəlilətmək üçün mühüm bir platforma yaradır. Eyni zamanda, ictimaiyyətlə əlaqələr bu mövzuda şəffaflıq, etik kommunikasiya və beynəlxalq əməkdaşlığı təmin etmək üçün açar rola sahibdir.
Essedə COP29-un əsas məsələləri və Azərbaycanın iqlim dəyişikliyi sahəsində öhdəliklərinin yerinə yetirilməsində PR-in rolu ətraflı təhlil olunur. Baş katibin fikirlərinə görə, PR vasitəsilə qlobal səviyyədə iqlim mövzusunda məlumatlılıq və hərəkətə çağırış gücləndirilməlidir ki, bu da Azərbaycanın beynəlxalq arenada əhəmiyyətli bir nümunə rolunu oynamasına töhfə verə bilər.
Bu uğur, Azərbaycan PR Mütəxəssisləri Assosiasiyasının dünya səviyyəsində səsinin eşidilməsinə və Azərbaycanın iqlim dəyişikliyi ilə bağlı məsələlərdə daha fəal iştirakına yeni perspektivlər açır.
Essenin tam mətni ilə bu linkdən tanış ola bilərsiniz: https://www.ipra.org/news/itle/itl-600-cop29-azerbaijan-takes-center-stage-in-global-climate-talks/
